Negosyo ng Nagretiro

Nakatanggap ako ng sulat mula sa isang retiradong empleyado. Ito ang kanyang sinulat: “Ako po ay isang retiradong empleyado. Sumubok po kami ng trucking business pero di po kumikita dahil sa pagluluko ng nakukuha naming driver. Saan po kaya ako makakapag-invest o makapaglalagak ng pera na siguradong kikita? Sa bangko po kasi ay lumiliit na ang interest. Ok lang po ba na mag-invest ako sa mga insurance company na may stock investment? Nakakatakot po kasi ang kalagayan natin sa Pilipinas.Hindi ko po alam kung ano ang matatag na kumpanya para paglagakan ng pera. Magbigay nga po kayo ng kumpanya o banko na magbibigay ng malaking interest rate.”

Ang aking sagot:

Sa limitadong impormasyong ibinigay mo, dalawa ang nakikita kong maling hakbang sa pagtatatag ng isang negosyo.

Una, pumasok sa negosyong marahil ay wala kang sapat na kaalaman tungkol dito. Kung hindi ay dapat nalaman mo agad na isa sa pinakadelikadong aspeto ng negosyong ito ang mga driver. Dapat sana ay naging mas maingat ka sa pagpili ng mga kukuning driver o di kaya ay nagpatupad ka ng mga pag-iingat para maiwasan ang tukso sa mga nagmamaneho ng iyong mga sasakyan na gumawa ng hindi tama. Tinalakay natin noong nakaraang linggo na isa sa mga kailangan sa pagtatatag ng negosyo ang pagkakaroon ng passion o marubdob na damdamin at interes sa papasuking gawain. Maaaring itanong mo kung paano malalaman na mayroong ganitong passion sa pinasok mong trucking business. Una marahil ay kung may sapat kang kaalaman sa pagpapatakbo at pagmamantine ng mga trak. Ang ganitong negosyo ay mangangailangan ng kaalaman sa kung magkano ang gastusin sa pagkuha ng iba’t ibang klaseng permit at lisensiya mula sa pamahalaang panlalawigan o panlungsod, munisipyo at maging mga ahensiya sa barangay. Bukod pa sa pagiging maselan ang isyu ng pagkuha ng driver, dapat ay may detalyadong impormasyon ka hinggil sa iyong mga kliyente, iyong mga sasakyan at kalagayan ng kapaligiran o kaligtasan sa mga lugar na sakop ng iyong operasyon.

Ang pangalawang maling hakbang na iyong ginawa ay hindi mo binigyang konsiderasyon ang iyong edad. Dahil nga retirado ka na, masasabing nasa higit 60 anyos ka na at ang iyong kakayahang humarap sa mga suliranin ay halos hindi na ganoon kataas. Nasabi ko nga sa nagdaang pagtalakay na 5 hanggang 15 porsiyento lamang ng mga bagong negosyo ang nagiging tagumpay sa unang limang taon ng operasyon. Malaki ang tsansa ng pagkalugi at dapat alamin ang kahandaang humarap sa mga risks. Sa iyong kalagayan, wala ka nang regular na kita o suweldo dahil posibleng wala ka nang sapat na pisikal na lakas at talas ng pag-iisip para gawin ang mga regular na trabaho. Sakali mang may kakayahan ka pa, kakaunti lamang ang maaaring kumuha sa iyo. Kaya dapat kang maging mas maingat sa pamamahala ng naipong pera. Hindi ka na maaaring magkamali dahil kakaunting panahon na lamang ang mayroon ka para makabawi. Hindi naman masamang magkamali kung may sapat kang panahon para makabangon.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: